paragraf - Interess
Interess
Nus represchentain ils interess dal rumantsch. Cun intervenziuns giuridicas u politicas reagin nus en cas che la legislaziun da lingua na vegn betg resguardada. Nus sensibilisain cunzunt organisaziuns dal servetsch public per il diever dal rumantsch e s’engaschain politicamain, per ch’il rom normativ sin ils differents stgalims statals saja favuraivel al rumantsch. En spezial s’occupain nus dal diever dal rumantsch en l’administraziun publica, en scola ed en las medias. Nus cooperain cun organisaziuns da lingua e cultura en il chantun Grischun ed en Svizra e tgirain il contact cun gruppas linguisticas minoritaras en l’exteriur.
© Remo Caminada, Mokum GmbH
Il 2001 avain nus lantschà la Gruppa rumantscha dal Cussegl grond. La gruppa ha la funcziun da visiunari. Ella s'occupa da dumondas actualas da la politica linguistica, po envidar spezialists per furmar l'opiniun e deliberar recumandaziuns per mauns da la Regenza. Actualmain dumbra la Gruppa rumantscha dal Cussegl grond 30 commembers.
L'organisaziun vegn manada d'in gremi da trais persunas. Il post dal president vegn occupà mintg'onn dad in'autra persuna.
Per il giubileum da 75 onns rumantsch sco lingua naziunala avain nus fundà il 2013 a Berna la gruppa parlamentara «lingua e cultura rumantscha». Presidiada vegn quella gruppa da cusseglier naziunal Martin Candinas. Ina giada l'onn organisain nus in inscunter per la gruppa, per exempel la sairada grischuna-rumantscha en la Chasa federala.
Sco commember da la gruppa parlamentara cumprovan ils politichers lur simpatia per la lingua e cultura rumantscha. Nus da nossa vart vegnin a sustegnair moziuns areguard minoritads linguisticas che vegnan inoltradas da parlamentarias e parlamentaris ubain ad organisar atgnas.
La finamira da la gruppa parlamentara per la lingua e cultura rumantscha è da render attent la populaziun svizra a la quarta lingua naziunala e da la sensibilisar per quella. Ultra da quai duain ils basegns da las Rumantschas e dals Rumantschs chattar uschia la via en la politica.