paragraf - Rumantsch en la diaspora
Rumantsch en la diaspora
Radund in terz da las Rumantschas e dals Rumantschs abitescha en la diaspora rumantscha, vul dir ordaifer il territori linguistic rumantsch. Sin fundament da quai ha il Cussegl federal fixà en la missiva da cultura per ils onns 2021 fin 2024 la prioritad da promover la lingua e cultura rumantscha en la diaspora rumantscha. La finamira è da metter a disposiziun en l’avegnir purschidas da furmaziun rumantschas ad uffants e giuvenils en la diaspora e da pussibilitar al conturn dals uffants e giuvenils da duvrar la lingua en il mintgadi.
Sa fundond sin questa situaziun avain nus instradà la fin da l’onn 2021 il project «Rumantsch en la diaspora» che è vegnì sustegnì da l’Uffizi federal da cultura cun ina contribuziun da 50’000 francs. Cun quest project vulevan nus cuntanscher las Rumantschas ed ils Rumantschs en la diaspora rumantscha e sclerir ils giavischs e basegns da famiglias, uffants e giuvenils. La finamira finala dal project è da metter il fundament per ina collavuraziun instituziunalisada cun persunas en la diaspora, fundar cuminanzas rumantschas localas e pudair implementar tras quai ina purschida persistenta per famiglias, uffants e giuvenils en la diaspora rumantscha.
En in’emprima fasa essan nus vegnids en contact cun persunas interessadas ch'èn stadas prontas da furmar cuminanzas localas e sviluppar purschidas concretas per la gruppa en mira. Quest pass è succedi tranter il schaner 2022 ed il zercladur 2022, cun il resultat da tschintg fundaziuns da cuminanzas rumantschas. Las novas cuminanzas sa chattan a Basilea, Berna, Lucerna, Son Gagl / Appenzell e Winterthur. En ina segunda fasa han las cuminanzas organisà en collavuraziun cun nus arranschaments che pussibiliteschan l’inscunter cun las famiglias interessadas, promovan activamain la discussiun davart lur basegns ed augmentan la visibilitad da purschidas da furmaziun existentas.