kidsfits per sursilvan | Lia Rumantscha

04-01: Oz ei il Di dalla scartira da Braille

Cu has ti natalezi? Sas ti gia leger la data da tiu natalezi? In anniversari impurtont per fetg biars carstgauns che san buca leger cun ils egls ei igl anniversari da Louis Braille. El ei naschius ils 4 da schaner 1809. Pervia dad el ei quei il Di dalla scartira da Braille, la scartira per persunas tschoccas.

11-02: Oz ei il Di dils malsauns

Dapi 1993 ei ils 11 da fevrer mintgamai il di per patertgar vid ils malsauns e gidar els. L’idea per in tal di ha igl anteriur papa Gion Paul II giu, cura ch’el sez era ina ga fetg malsauns.

15-02: Oz ei il Di dil vierm da plievgia

Cucu … cheu sun jeu! Giu cheu! Jeu cuchegel ord la tiara mo cura ch’ei plova. Il sulegl hai jeu buca bugen. Ti vesas mei, mo jeu vesel nuot, jeu sun tschocs. Persuenter sun jeu fetg ferms. Jeu sai alzar tochen 60 gadas mia atgna peisa. Sche ti peisas 25 kilos, fuss quei sco sche ti pudesses alzar 1’500 kilos, pia in grond auto!

14-03: Oz ei il Di internaziunal dalla matematica 

En scola emprendas ti che matematica ei dumbrar e quintar. Per exempel plus e minus. El rom matematica emprendas ti era da mesirar e da plazzar ni dessignar musters, forsa schizun fuormas geometricas sco per exempel
trianghels ni quadrats. Matematica dat ei denton buca mo en scola. Sch’ins mira bein, vesan ins dapertut matematica. Vesas ti en tiu mintgadi diembers, musters e fuormas?

23-03: Oz ei il Di internaziunal dalla meteorologia

Daco dat ei in Di internaziunal dalla meteorologia? L’aura enconuscha negins cunfins dallas tiaras. Perquei eis ei impurtont che meteorologas e meteorologs digl entir mund lavurien ensemen. Per exempel pervia dils huricans: quels stemprai ein prigulus e sche las meteorologas ed ils meteorologs dad ina tiara san ch’ei dat in hurican, san els avertir lur collegas ellas autras tiaras. Per ch’els sappien luvrar bein ensemen e brattar informaziuns, han ins fundau ils 23 da mars 1950 l’organisaziun ‹World Meteorological Organization›, l’organisaziun mundiala dalla meteorologia. Ils 23 da mars ei igl anniversari da quella organisaziun.

27-03: Oz ei il Di mundial dil teater

Has ti era gia udiu la construcziun: «Cala da far teater!»? Forsa che tes geniturs ni tia scolasta han detg quei, cura che ti has fatg da quei ch’ins duess buca far … Per exempel cura che ti has fatg da clown! Ils 27 da mars has ti ina buna stgisa per far teater scosauda. Ti sas dir: «Bein, oz fetsch jeu teater! Ils 27 da mars ei numnadamein il Di mundial dil teater.»

23-04: Oz ei il Di mundial dil cudisch

L’UNESCO ha declarau ils 23 d’avrel sco Di mundial dil cudisch. Daco gest ils 23 d’avrel? Quei ha da far cun ina tradiziun dalla Catalugna, nua ch’ins festivescha quella data il di dil num da sogn Gieri. Quei di schenghegia la glieud rosas e cudischs ina a l’autra.

30-04: Oz ei la Notg dil barlot

Quei meins dat ei buc in di special, mobein ina notg speciala! La notg dils 30 d’avrel sin igl 1. da matg vegn era numnada «la Notg dil barlot». Pli baul schevan ins che las strias vegnien ora quella notg per saltar e far legher ensemen. Pia per far in dètg «barlot».

17-05: Oz ei il Di mundial da far pettas e paun
Happy birthday petta da natalezi! Gie, era la petta da natalezi ha in agen di da fiasta ni pia: in agen di mundial. Ils 17 da matg ei il Di mundial da far pettas e paun.

08-06: Oz ei il Di dalla mar

Nies planet, la Tiara, vegn era numnaus «il planet blau». Viu da lunsch, per exempel giu dalla glina, ei nies planet per gronda part blaus – pervia dalla mar. Sin nies mund ei dapli surfatscha cuvretga cun aua che cun tiara. La mar ei enorm impurtonta per nus carstgauns e per ils animals. Perquei sto la mar vegnir protegida. Per far attent a quei fatg han las Naziuns Unidas decidiu da festivar il Di internaziunal dalla mar.

13-08: Oz ei il Di dallas zanistreras e dils zanistrers

Cun tgei maun scrivas ti? Cun tgeinin malegias ti? E cun tgeinin va ei meglier da tagliar? Cun il dretg ni il seniester? Ils biars carstgauns fan quellas caussas cun il maun dretg, els ein dretgers. Sche ti scrivas, malegias, taglias e bettas ina balla il pli bugen cun il maun seniester, lu eis ti zanistrera ni zanistrer e quei di ei specialmein per tei!

15-09: Oz ei il Di internaziunal dil punct

Tut ha entschiet cun il cudisch «The dot» – «Il punct» che raquenta la historia dalla mattatscha Vashti. Ella crei ch’ella sappi buca malegiar. «Entscheiva semplamein cun in punct», di sia scolasta. Vashti fa quei e malegia semplamein in punct amiez il fegl.

21-09: Oz ei il Di dalla pasch

Co fas ti pasch? Forsa cun dar il maun e dir: «Lein far pasch»? Il Di dalla pasch, ils 21 da settember, duein tuts calar da cumbatter in l’auter. Las armas stuessen atgnamein quescher quei di.

06-10: Oz ei il Di dil surrir

Enconuschas ti il smiley? Ti has segir gia viu la sempla fatscha melna che surri. Forsa has ti viu il smiley sin in taccader, forsa sin il telefonin, ni forsa has ti in etui ni auter material da scola ni da scoletta cun si il smiley. Il plaid «smiley» vegn digl engles. «smile!» vul dir «surri!».

10-10: Oz ei il Di mundial dil tgaun

Cheu vegn il di per Lupo! Il Di mundial dil tgaun duein ils carstgauns dir engraziel als tgauns per tut quei ch’els fan per els. E Lupo fa bein buna luna a nus. Perquei ha el meritau ina ligiongia! Ni forsa era duas.

09-11: Oz ei il Di dallas inventadras e dils inventaders

Tgi ha atgnamein inventau las caussas che nus duvrein mintga di? Tgi ha inventau il telefonin, il pér electric, il velo, la frestgera, il pupi ni ils jeans? Biaras da quellas caussas ein buca stadas cheu d’in di a l’auter. Enzatgi ha avontut stuiu haver l’idea e zambergiar empremas versiuns dallas caussas.

20-11: Oz ei il Di dils dretgs digl affon

Tgei colur han tes cavels? Tgei colur ha tia pial? Eis ti gronds ni pigns? Sas ti cuorer sco in leopard ni sesas ti ella sutga cun rodas? Eis ti in buob ni ina buoba? Tut quellas differenzas giogan negina rolla.

11-12: Oz ei il Di internaziunal dalla muntogna

Saveis vus ch’ei dat in di special aposta per nossas muntognas? El duei regurdar nus che las muntognas ein fetg impurtontas per nies planet. Las muntognas maiestusas ein buca mo fetg bialas per mirar, ellas ein era nizeivlas ed impurtontas per nies sistem ecologic.

(rumantsch grischun)

01. Alvetta
02. Il Retg-rauna
03. Maisina, T'emplaina!
04. La chapitscha cotschna 
 

(rumantsch grischun)

01. Tschendrina
02. Il cusunz curaschus
03. Il luf ed ils set ansiels 
04. Gion da la fortuna
 

(rumantsch grischun)

01. Gionin e Grettina
02. Rosaspina
03. Ils musicants da Brema
04. Alvina e Rosetta
 

(rumantsch grischun)

01. Dunna Holla
02. Ils chalzers isads
03. Rumplarot
04. Il retg Barbatursch
05. Rampunella
06. Las stailas-marenghin